ଏହି ସପ୍ତାହର ଅତିଥି : ଗାୟତ୍ରୀ ପ୍ରଧାନ ଅତିରିକ୍ତ ଏସପି , ବାଲେଶ୍ୱର

ଏହି ସପ୍ତାହର ଅତିଥି : ଗାୟତ୍ରୀ ପ୍ରଧାନ ଅତିରିକ୍ତ ଏସପି , ବାଲେଶ୍ୱର

ହ୍ରିତିକ ନାୟକ: ପିଲା ବେଳୁ ପୋଲିସ ହେବାର ସ୍ବପ୍ନ ଥିଲା ନା ଆଉ କିଛି ?

ଗାୟତ୍ରୀ ପ୍ରଧାନ: ପିଲାବେଳୁ ମୋର ଡାକ୍ତର ହେବାର ଇଚ୍ଛା ଥିଲା। କିନ୍ତୁ ପରବର୍ତ୍ତୀ ସମୟରେ ସମାଜ ପାଇଁ କିଛି କରିବାର ଆଗ୍ରହ ମୋତେ ପୋଲିସ ସେବାରେ ଆସିବାକୁ ପ୍ରେରିତ କଲା।

ହ୍ରିତିକ ନାୟକ: ବାଲେଶ୍ୱରରେ ଆଇନ-ଶୃଙ୍ଖଳା ସୁଦୃଢ କରିବା ପାଇଁ ଆପଣଙ୍କ ପ୍ରାଥମିକତା କଣ ?

ଗାୟତ୍ରୀ ପ୍ରଧାନ: ବିଶେଷକରି ଦୁର୍ବଳ ବର୍ଗ, ମହିଳା, ଶିଶୁ ଏବଂ ବୃଦ୍ଧ ଲୋକମାନଙ୍କ ସୁରକ୍ଷାକୁ ଆମେ ପ୍ରାଥମିକତା ଦେଉଛୁ। ସେମାନଙ୍କ ସମସ୍ୟାର ଶୀଘ୍ର ସମାଧାନ ସହିତ ଆଇନ-ଶୃଙ୍ଖଳାକୁ ଆହୁରି ସୁଦୃଢ କରିବାକୁ ପଦକ୍ଷେପ ନିଆଯାଉଛି।

ହ୍ରିତିକ ନାୟକ: ମହିଳା ମାନଙ୍କ ସୁରକ୍ଷା ପାଇଁ ପୋଲିସ ପକ୍ଷରୁ କେଉଁ ବିଶେଷ ପଦକ୍ଷେପ ନିଆଯାଇଛି ?

ଗାୟତ୍ରୀ ପ୍ରଧାନ: ପ୍ରତ୍ୟେକ ଥାନାରେ ମହିଳା ଓ ଶିଶୁ ଡେସ୍କ ସ୍ଥାପନ କରାଯାଇଛି। ଏଥିସହିତ ଲୋକମାନେ ଅନଲାଇନ୍ ମାଧ୍ୟମରେ ମଧ୍ୟ ଅଭିଯୋଗ କରିପାରିବେ। କୌଣସି ଆପତ୍ତିକାଳୀନ ସମସ୍ୟା ହେଲେ ୧୧୨ ନମ୍ବରକୁ ଡାଏଲ୍ କରି ସହାୟତା ନେଇପାରିବେ।

ହ୍ରିତିକ ନାୟକ: ସାଇବର ଠକେଇ ଘଟଣା ବଢୁଥିବାବେଳେ ଲୋକମାନେ କେମିତି ସତର୍କ ରହିବେ ?

ଗାୟତ୍ରୀ ପ୍ରଧାନ: ଅଜଣା ଲିଙ୍କ୍ କିମ୍ବା ସନ୍ଦିଗ୍ଧ ମେସେଜ୍‌କୁ କ୍ଲିକ୍ କରନ୍ତୁନାହିଁ। ବ୍ୟାଙ୍କ ନାମରେ ଆସୁଥିବା ଫୋନ୍ କଲ୍‌ରେ ସହଜରେ ବିଶ୍ୱାସ କରନ୍ତୁ ନାହିଁ। ପ୍ରଥମେ ଭାବନ୍ତୁ, ପରେ ପଦକ୍ଷେପ ନିଅନ୍ତୁ। କୌଣସି ସାଇବର ଠକେଇ ଘଟିଲେ ୧୯୩୦ ନମ୍ବରକୁ ଡାଏଲ୍ କରନ୍ତୁ କିମ୍ବା
www.cybercrime.gov.in ରେ ଅନଲାଇନ୍ ଅଭିଯୋଗ କରନ୍ତୁ।

ହ୍ରିତିକ ନାୟକ: ଜୀବନର ସବୁଠୁ ସୁଖ ଓ ଦୁଃଖଦ ମୁହୂର୍ତ୍ତ ?

ଗାୟତ୍ରୀ ପ୍ରଧାନ: ଜୀବନର ସବୁଠୁ ସୁଖ ଓ ଦୁଃଖର ମୁହୂର୍ତ୍ତ ସେତେବେଳେ ଆସେ, ଯେତେବେଳେ ଆମ ପରିବାର ସଦସ୍ୟମାନେ ଆମ ପାଇଁ ଖୁସି କିମ୍ବା ଦୁଃଖିତ ହୁଅନ୍ତି। ସେହି ମୁହୂର୍ତ୍ତଗୁଡ଼ିକ ଜୀବନରେ ସବୁଠୁ ଅଧିକ ଗୁରୁତ୍ୱପୂର୍ଣ୍ଣ।

ହ୍ରିତିକ ନାୟକ: ବାଲେଶ୍ୱର ଜନସାଧାରଣଙ୍କ ପାଇଁ ଆପଣଙ୍କ ବାର୍ତ୍ତା କଣ ?

ଗାୟତ୍ରୀ ପ୍ରଧାନ: ଆମେ ସମାଜର ସୁରକ୍ଷା, ଶାନ୍ତି ଓ ଶୃଙ୍ଖଳା ବଜାୟ ରଖିବା ପାଇଁ ସଦା ସମର୍ପିତ। ସମସ୍ତଙ୍କୁ ଅନୁରୋଧ, ଆଇନକୁ ସମ୍ମାନ କରନ୍ତୁ, ସନ୍ଦିଗ୍ଧ କାର୍ଯ୍ୟକଳାପ ଦେଖିଲେ ତୁରନ୍ତ ପୋଲିସକୁ ସୂଚନା ଦିଅନ୍ତୁ ଏବଂ ସହଯୋଗ କରନ୍ତୁ। ଆପଣମାନଙ୍କ ସହଯୋଗରେ ଆମେ ଏକ ସୁରକ୍ଷିତ ସମାଜ ଗଢ଼ିପାରିବୁ।

ସାକ୍ଷାତକାର : ହ୍ରିତିକ ନାୟକ