ଦିନେ ସୂର୍ଯ୍ୟ, ରାତିରେ ଚନ୍ଦ୍ର; ଭଙ୍ଗା ଘରେ ବୃଦ୍ଧ ଦମ୍ପତିଙ୍କ ସଂଘର୍ଷମୟ ଜୀବନ
କୋରାପୁଟ, ୨୧/୦୬/୨୬: ବିକଶିତ ଓଡ଼ିଶାର ସ୍ୱପ୍ନ ଓ ବିକାଶର ବଡ଼ ବଡ଼ ଦାବି ମଧ୍ୟରେ ଆଜି ବି କିଛି ପରିବାର ମୌଳିକ ସୁବିଧାରୁ ବଞ୍ଚିତ ରହିଛନ୍ତି। କୋରାପୁଟ ଜିଲ୍ଲା ସେମିଳିଗୁଡ଼ା ବ୍ଲକର ପାଖଝଳା ଗ୍ରାମର ବୃଦ୍ଧ ଦମ୍ପତି ରାଧିକା ନାୟକ ଓ ତାଙ୍କ ସ୍ୱାମୀଙ୍କ ଜୀବନ ସେହି କଠିନ ବାସ୍ତବତାର ଏକ ଜ୍ୱଳନ୍ତ ଉଦାହରଣ। ଦାରିଦ୍ର୍ୟ ସହ ସଂଘର୍ଷ କରୁଥିବା ଏହି ଦମ୍ପତିଙ୍କ ପାଇଁ ଏକ ଜରାଜୀର୍ଣ୍ଣ କାଦୁଅ ଘର ହିଁ ଏକମାତ୍ର ଆଶ୍ରୟସ୍ଥଳ। ଘରର ଛାତ ଓ କାନ୍ଥ ଭାଙ୍ଗି ଯାଇଛି ଯେ, ଦିନବେଳେ ଘର ଭିତରୁ ସୂର୍ଯ୍ୟ ଓ ଆକାଶ ସ୍ପଷ୍ଟ ଦେଖାଯାଏ। ରାତି ହେଲେ ଚନ୍ଦ୍ର ଓ ତାରା ମଧ୍ୟ ଘର ଭିତରୁ ଦୃଶ୍ୟମାନ ହୁଏ। ବର୍ଷା ଋତୁ ଆସିଲେ ସେମାନଙ୍କ ଦୁର୍ଦ୍ଦଶା ଆହୁରି ବଢ଼ିଯାଏ। ଛାତରୁ ପାଣି ଗଳି ଘର ଭିତରେ ଜମିଯାଏ। ଯେକୌଣସି ସମୟରେ କାନ୍ଥ ଭୁଶୁଡ଼ି ପଡ଼ିବାର ଆଶଙ୍କା ରହିଥିବା ବେଳେ ସାପ, ବେଙ୍ଗ ଭଳି ପ୍ରାଣୀ ଘର ଭିତରକୁ ପସି ଆସିବାର ଭୟ ମଧ୍ୟ ଲାଗି ରହିଛି। ଅଭିଯୋଗ ଅନୁଯାୟୀ, ଦୀର୍ଘ ୧୫ ବର୍ଷ ଧରି ସେମାନେ ସରକାରୀ ଆବାସ ଯୋଜନାରେ ଘର ପାଇଁ ଆବେଦନ କରି ଆସୁଛନ୍ତି। ବାରମ୍ବାର ୱାର୍ଡ ସଭ୍ୟ, ସରପଞ୍ଚ, ପଞ୍ଚାୟତ କର୍ମଚାରୀ ଓ ବ୍ଲକ ପ୍ରଶାସନଙ୍କ ନିକଟରେ ଗୁହାରି କରିଥିଲେ ମଧ୍ୟ ଏପର୍ଯ୍ୟନ୍ତ ସେମାନଙ୍କୁ ଘର ମିଳିନାହିଁ। ଏହି ଘଟଣା ପୁଣିଥରେ ସରକାରୀ ଯୋଜନାର ବାସ୍ତବ କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠିଛି। ବିକାଶର ଚିତ୍ର ମଧ୍ୟରେ ରାଧିକା ନାୟକଙ୍କ ଭଳି ଅସହାୟ ପରିବାରମାନେ କେବେ ସରକାରୀ ସହାୟତା ପାଇବେ, ତାହାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଏବେ ଦେଖିବାକୁ ବାକି ରହିଲା, ଏହି ଘଟଣା ସାମ୍ନାକୁ ଆସିବା ପରେ ପ୍ରଶାସନ ଓ ଜନପ୍ରତିନିଧିମାନେ ଏହି ବୃଦ୍ଧ ଦମ୍ପତିଙ୍କ ଦୁଃଖ ଦୂର କରିବା ଦିଗରେ କେତେ ଶୀଘ୍ର ପଦକ୍ଷେପ ନେଉଛନ୍ତି।
